Лельчыцкі раён ― адзін з самых прыгажэйшых куточкаў у свеце.
Прыроднае хараство, што тут пануе, можна назваць сапраўды казачным.
Густы і ціхі лес прыме кожнага, хто захоча ў ім пабываць. Разважліва шалясціць лісце шматвекавых дрэваў, махаючы галінкамі. Стройныя бярозкі, магутныя дубы, высачэзныя сосны сустракаюць з маўчалівай згодай. Тут, у лесе, адчуваецца подых спакойлівасці, лагоднасці. Як нідзе тут, у Лельчыцкім раёне, напаўняешся той моцнай энергетыкай, што дораць дрэвы. Нездарма кажуць, у ціхіх Лельчыцах — сэрца лечыцца.
Самая галоўная прыгажуня нашага краю — безумоўна, рака Убарць. Яна парадзіла поймавыя дубровы, дзе ціха і, калі апыняешся побач, — душа пяе. У нашай Убарці розны настрой. Калі сонечна, то блакітная, калі хмурыцца, то срэбная, а бывае проста жоўтага, балоцістага колеру… Абавязкова паназірайце. Але б які ў яе не быў настрой — заўсёды прыгажуня.
Сумуе ў адзіноце далёкі сябар нашай Убарці — Цар-дуб пад Данілевічамі. Але ж ён моцны, усё вытрымае, што і робіць ужо шмат вякоў. Нікога не паскардзіць і сустрэне дабратою, хто да яго прыйдзе.
Прыгажосць нашага краю неаднаразова апявалі пісьменнікі. У кожнага, хто пабывае ў нашым краі, застаецца шмат уражанняў.
Калі ласка, чакаем вас у Лельчыцкім раёне.
Канстанцін КАВАЛЁЎ.
Фота аўтара і з адкрытых крыніц.
